صينيه سمك ماكريل فى الفرن مع شوربه سى فود خفيفه 2016

اول الصينيه السمك
المقادير
سمك على قد عدد الافراد
الحشوه
بصلتين كبار مفرومين-5 فصوص توم-2 فلفل رومى كبير مقطع صغير-2 طماطم مقطعه صغير-كرفس او كسبره خضرا (المتوفر)-5 ليمونات كبار +ليمون شرايح للتزيين-1/3 كوب زيت -معلقتين كبار خل-التوابل(ملح -فلفل-بهار-كمون)




اول حاجه ادعك البصله مع الملح والفلفل بأيدى عشان تدبل



وبعدين اضيف باقى الخضار والليمون والتوابل واقلب



طبعا السمك متنضف وزى الفل
احشى كل سمكه بالحشوه وبعدين ارصهم فى صينيه مدهونه بشويه زيت صغيرين واللى يتبقى من الحشوه اوزعه على الفراغات الموجوده فى الصينيه وادخل الصينيه تقعد فى التلاجه حوالى ساعه


ارش فوق وش الصينيه كميه مناسبه من الزيت وازين الصينيه بشرايح طماطم وفلفل وليمون
اسخن الفرن على درجه حراره عاليه وادخل الصينيه السمك لحد ما السوائل كلها تنشف ووش السمك يحمر وده شكل الصينيه بعد ما طلعت


ثانيا شوربه السى فود
المقادير
كيلو سى فود جاهز او هاتى من كل حاجه 1/4 كيلو(جمبرى مقشر-كاليمارى مقشر-كابوريا-جندوفلى(بيتسمى بلح البحر او بكلويز)
بصله كبيره مقطعه كبير-جزره مقطعه-كرفس-كرات-ورقتين لاورو-6 كوب ماء-1 كوب لبن-معلقتين طعام كبيره دقيق-معلقتين طعام زبده او سمنه-ملح وفلفل
لو هتجيبى كل حاجه لوحدها يبقى لازم تجهزيها كالاتى:-
الجمبرى:يتقشر ويتغسل كويس ويتشال من ضهره الخط الاسود
الكاليمارى:يتغسل يتقطع كويس
الكابوريا:نشطفها كويس وممكن ناخد شويه ايدين تكون كبيره وسليمه
الجندوفلى:نغسله واحده واحده تحت الميه عشان نتاكد انه مفيهوش رمل واللى منعرفش نفتحها تبقى وحشه وتترمى



هنا مكوناتى جاهزة ومتنضفه ولكن للاسف السى فود كان معاها سمك فيليه فاضطريت انى اقطعه واعصر عليه ليمون وملح وفلفل لئن السمك الفيليه بيزفر الشوربه وشوربه السى فود الكويسه مش بيكون فيها سمك فيليه
المكونات دى مش بتاخد وقت فى سلقها نهئى والا هتتهرى وشكلها هيبوظ هما 3 دقايق بالعدد
هنجيب الميه ونحط فيها البصل والجزر والكرفس وورق اللاورو ونحطها على النار واول ما الميه تغلى ننزل بالمكونات نقلبها ونغطيها وبعد ما تبدأ تغلى احسبى 3 دقايق بالعدد وبعدين اطفى عليها وصفيها من الشوربه



نجيب حله ونحط فيها الدقيق والزبده كئننا هنعمل صلصه بشامل بالظبط
وتقليبتين لحد ما ريحه الدقيق تطلع وبعدين ننزل بالشوربه المتصفيه






ننزل بالشوربه مع التقليب المستمر واول ما تبدأ تغلى نضيف كوبايه اللبن والملح والفلفل نقلب ونسيبها دقيقتين تغلى
نضيف مكونات السى فود ونقلب ونطفى عليها على طول



شوربه السى فود بتتقدم بعد ما تتعمل على طول ولو عندك عزومه ممكن تعملى الجزء السايل وساعه التقديم اغلى الشوربه وضيفى المكونات وقدميها علطول
نقدم معاها ليمون يتعصر على الشوربه

فى امان الله وحفظه




المصدر: منتدى عدلات - من قسم: اكلات للرجيم واطباق صحية

منتديات مقهى كل العرب - مقهى الأرشيف | Archive