مذاق الالم

عفوأ احبائي مذاق الالم حان
من منهل بلاد ألمها يتزايد


من موطن ماهو مثل كل الاوطان
عز الديار ان كان للعز عايد


عنوانها ماله ابد أي عنوان
لكن مع الاموات مامن بعايد


مات الامان وباح من موته انسان
وتواردت افكار شعره طرايد


الحكي مايردع ابد ظلم عدوان
الى متى استنكار الاوضاع سايد


ضاق الصدر والضيق في بعض الاحيان
يرسل سهوم الحرف نار وقايد


ضاق الصدر والعذر من كل من كان
ان جاء في معنى كلامي نقايد


ماني على الدنيا حريص وشفقان
لو شفت منها كل خير وفوايد


لاصار لي في عالم الذل اخوان
وشعب يذوق المر حاله نكايد


الم .. مواجع.. كل تعابير الاحزان
يعيشها في صبر والصبر كايد


ياصاحبي مايجتمع كفر وايمان
ومال الشدايد غير ناس شدايد


العمر مره والزمن ماله امان
ولابه على ماقيل عندي جدايد


هي بس كلمه مصدره قلب ولسان
وعلق عليها من كثير القلايد


عز العرب مامات لاشك تعبان
يشكي يبي له تالي الوقت قايد


يشكي يبي افعال والفعل برهان
ماهو حكي واخبار صحف وجرايد


يشكي يبي من عالم العز شجعان
امثال (فيصل) وطيب العلم (زايد)

المصدر...