جدار السكوت - للشاعر معيض العمري

[alfares]

بعد اذنكم ودي آحطّم جدار السكوت
....... واخرج من العالم الصامت وصوتي قويْ
بالمرمر انظم عقود افكار جزل البيوت
.........وبالحرير انسج اوزاني وحرف الرويْ
سريت حتى ابتلعني الليل (والليل حوت)
.........في بطنه اسكب غضب قلبي ومايحتوي
عجايب الليل تخفيها سقوف البيوت
..........كم قلب خلف الجدار المحترق منزوي
والدمع كنّه (خيوط العنكبوت) .. ويموت
............السرّ.. والقلب ( غار ) وذكرياته خوي
اشوف صوته وصوت الخلّ للخلّ قوت
...........يمتدّ في قاع صدري والغرام ا يْعوي
احسّ بالعاشقين وصوت ( يضحك) لصوت
..............واحسّ بالمتعبين وزفرة المنكوي
واحسّ بالظامي التايه بقفْر الخبوت
.............الخوف يلعب بنبضاته ولا يرْعوي
يحتاج لحظة ندم تجتاح دمعة سكوت
.............كانه يبي يهتدي نحو الطريق السوي