رواية تهزمني السمراء وأنا نّد فرسان

.
( تهزمني السمراء وأنا نّد فرسان) للكاتبة: أديم
.
.
.
الشخصيات
ثنيان ( البطل )
عمره 30 متزوج وعنده 3 زوجات انسان صاااارم وقوي لدرجه محد يرد الكلمه عليه الكل يهابه والكل يخافه اولهم زوجاته صعب مزاجي وإنسان صعب التعامل معه لانه ممكن في لحظه يقلب الطاوله على اي شخص ما يعجبه ومتمرد نوعا ما وقلبه رهيف ومزواج درجه اولى لكن قاسي ولا يسمح لقلبه يهزمه ونرجسي نوعاً ماولكن له شخصيه مخفيه يخفيها عن الكل ما عدا شخص واحد وهو ( عجاج )وسيم برجوله وله ضحكه لله درها
وطبعا أب ويحب عياله كثير ولكن الصرامه موجوده
( زوجاااااته )
الاولى : منيره تكون بنت عمه انسانه مسالمه ومتدينه واهم ما عليها رضا ثنيان وحياة ولدها سنعه وتحب الشغل والتنظيف وتسكت كثير بس اذا عصبت ينتهي الامر وام اكبر عياله محمد عمره ( 10 سنه )
الثانيه :مشاعل انساااانه مثقفه وماهي سهله هاديه بس تحفر من تحت لتحت وقدام ثنيان مسكييينه ومن وراه حييه وام لولده الثاني ( عمر وعمره 7)
الثالثه : مي الخبيثه اللي كل المشاكل من تحت راسها توها عروس من شهور وهي اللي جايبه راس ثنيان بدلعها وحلاوتها لكن طبعا ما يعطيها ثنيان جوها كثير وجميله جددا وهذا اكبر اسلحتها
................••............
عايله ابو سيف
ابو سيف: هو نفسه ابو ثنيان شايب كبيير وقديم في عمره وقاسي مثل ثنيان ومورثه قوته على الحريم وصعب مزاج ونادرا مايرق ويلين
ام سيف : ام ثنيان كبيره في سنها وقديمه عصر من الحريم الكبار الانتقاديات القويات واللي متماشيه مع وضع ابو سيف وقوته
سيف : اخو ثنيان الكبير : وهذا طبعا عكسهم تماما انسان بااااارد الحياه عنده زي ماتجي تجي ماهو مهتم لاي شي يصير متزوج ( زوجته : ثريا تصير اخت منيره وقويه عكس اختها منيره وعكس زوجها لكن قوه بهداوه
بندر : ولده الكبير عمر 20وهذا طبعا نسخه من ابوه واطباعه بس يزيد بالغشامه والنذاله وهذا اللي يخلي ثنيان مستقعد له
فجر: عمرها 17 هاذي طبعا مسكينه وحبيييبه وماعندها حال مايل كل شي عندها سيده وتشوف ثنيان قدوه لها)
دلال : اخت ثنيان الكبيره شخصيتها عاديه ارمله ومسالمه نادرا ما تعصب او تسبب مشاكل وعايشه مع ابوها
شوق : بنتها الكبيره عمرها 19 انسانه جرئيه وقويه ما عليها في احد وترمي كلامها ولا تفكر بعواقبه
نوف : 18 هاذي مايطير الطير الطاير الا بعلمها تدري عن كل شي يصير فالبيت واسرار الكل وكيف الكل عايش حرفيا سوسه )
رهام : اخت ثنيان اللي اصغر منه قوية شخصيه بس بأدب واحترام كل شي عندها وكرامتها وطبعا حبيبه ومالها فالمشاكل مريضه بالقلب واحب شي لثنيان عمرها 24
نواف : اخو ثنيان الصغير عمره 22 انسان عفوي يطقطق ويضحك ويسولف لكن عله بنفس الوقت لكن بمجرد ومايشم ان ثنيان متواجد يصير اكثر انسان محترم ................••............
عايلة ابو محمد
ابو محمد اخو ابو سيف كبييير كبيير شايب ب 90 من عمره يضيع كثيير لكن ما ينسى ثنيان ودايما يناديه ويحبه حب عظيم
ام محمد : متوفيه
محمد اصغر عيال ابو محمد اصغر من ثريا
عمره 30 بسيط وهادي ورايق جوه عليل مو متزوج ومهتم بأبوه خواته وقريب من ثنيان كثيرر لكن عكسه
................••............
عجاج ( عجاج صديق ثنيان وروووحه يطلع ثنيان من شخصيته الصعبه بثواني ويجره معاه لجنون انسان رايق وسيع خاطر واهم شي فلته ومغامر درجه اولى ومن اهم صفاته انه اسمر ( خال )
لكن ابيض قلب ونيه 24 ساعه مستانس ومبسوط
وكان تضادده مع شخصية ثنيان كبير لكن يموت ثنيان على عجاج بشكل فضيع
................••............
البطله : الترف عمرها 24 ( سمرا هي بعد )
وحيدة ابوها امها متوفيه لكن طيبه بس طيبتها ععلى هباله شوي وعبيطه صاحبة حق ولا تعرف تسكت كل شي عندها عدل ماعندها صبر ابد واللي يأذيها تاكله اكل واهم شي محد يخرب راحتها ومزاجها وطبعا قوية بحق ولا مباليه وانفعاليه مره وغالبا تبدي الغير على نفسها ولا تنسى اي كلمه تنقال لها
وتحكم عليها بيئتها البدويه الجميله المختلفه تماماً بكل تفاصيلها وجميله جمال السمر اللي يسر العين عيون عسليه واسعه وحواجب مرسومه بترتيب وجنات مورده وابتسامه جذابه وشعر طويل يفتن ونظره تشلع القلب
ابو صالح : ابو الترف انسان بدوي قاسي صعب تحكمه بيئته الصعبه ورحال شايب قديم وتفكيره قديم
صالح : اخو الترف
شاب بدوي لطيف وشجاع تختلف شخصيته عن الباقي من قبيلته رغم انه في بيئه صعبه الا انه متفهم نوعاً ما وهادي ولكن كل شي الا الترف يحرق الدنيا عشانها
.
.
باقي الشخصيات الفرعيه بنتعرف عليها بالروايه
.
.
.
^
البارت الاول |..
في غرفة مي وقف ثنيان وهو يسكر زرار بدلتة العسكرييه علق رتبه وهو يرتبها بإهتمااام وحب كبييير لمهنته رتب شكله وهو يتعطر وقف وهو يناظر نفسه بإستقامه مثل كل يوم مد يده وهو ياخذ جواله برضا تام عن شكله وطلع وهو يسمع اصوات زوجاته العاليه اللي انخفضت اول ماسمعوا صوت جزماته بالارض
دخل المطبخ وهو رافع حواجبه : الفطور جاهز
منيره : ايه جاهز
جلس ثنيان وهو يقول بصوته الرخيم: وين العيال ماصحوا
مشاعل: الا صحوا بس يلبسون وينزلون
رفع ثنيان عينه بحده : فطور اليوم عند مين !
مي ببتسامه دلع وهي تجلس جنبه: عندي انا سويته
ثنيان بحده : كم مره قلت لك ما احب الجبن وشوله ترزينه في وجهي كل يوم وانا اكرر لين متى يعني
مي : نسيت والله بس
ثنيان بإنزعاج:خلاص بس لا تحوسين مخي من الصباح
مشاعل قربت ببتسامه غيض لمي : ولا تزعل الحين اشيلها واحطها للعيال في سندويشات
ثنيان : منييره
منيره: سم
ثنيان : اليوم بنتغدى مع عمي جهزي نفسك
منيره: ابشر
نزلوا العيال وجوا وهم يسلمون على ثنيان اللي لف وهو يقيمهم بنظره وقال بغضب :مشاعل
مشاعل :نعم
ثنيان : عمر وش لااابس ليش كذا ملبسته مو شايفه البرد
مشاعل: هو مايب.. قطع كلامها ثنيان اللي ناظرها بغضب: مافيه شي اسمه مايبي هذا طفل يمرض من النسمه خذيه لبسيه زي الاودام وان حصلته ثاني مره كذا تعرفين وش بيصير
مشاعل قربت وهي تاخذ عمر وطلعت ولف ثنيان وهو يطلع مصروفهم من جيبه واتجهه لمنيره وهو يعطيها الفلوس وطلع وهو يسمع مي اللي لاحقته وتوصيه بالاغراض سكتها لما رفع جواله وهو : مرحبا يا عجاج سنيني
ضحك عجاج : هلا ياضابطنا وينك
ثنيان : موجود انت وينك غريبه صاحي بدري
عجاج : لا قول توني بنام بس بقول لك شوي تعال نبي نغير جو زهقت
ثنيان : عطني عروضك وانا افكرر
عجاج ببتسامة مكر وهو يدري بثنيان يحب السامري واجواءه : محضر لك سااامري يعدل جووك
ثنيان: اوووه كذا كثيير
عجاج : انتظرك اجل
ثنيان : على خير
.................••
عند مي اللي رجعت بضيق بعد ما طنشها ثنيان وجلست وهي تشوف مشاعل نازله مع عمر
ضحكت بمكر : تجيبين الكلام لنفسك دايماً شايفه الدنيا برد ومصره على الكشخه اخر شي تهزئتي
مشاعل ناظرتها بطرف عين : على الاقل تهزأت عشان صحة ولدي وعشان خايف عليه مو على هباله وغباء وكأنك ما تعرفين في حياتك الا الجبن
مي بكيد : هههههههههه والله لا تلوميني ما خلى ثنيان امس فيني عقل
ناظرتها مشاعل ومنيره بقرف وكيف انها ترزز ب ليلتها مع ثنيان
منيره : محمد يمه قوم يلا خذ اغراضك وروح انت واخوك وانتبهوا من الطريق
محمد: يمه كل يوم اسمع ذا الموال والمدرسه قدام بيتنا
منيره: بالله عليك يعني مافيه طريق تمشي معاه ولا كيف اقول خلص واطلع لا اقول لابوك عن كلامك
محمد : زييين زييين
اخذ عمر وطلعوا متجهين للمدرسه ................••............
وفي طرف بعييييد ومكان ثاني في قريه صغيره برا المدينه رجعت الترف وهي تنزل دبة المويه بتعب: يا ويلي ويلااااه انكسر ظهري
صالح من وراها : وش بلاتس انتي تصارخين مع ذا الصبح
الترف : تعبت يا بن الحلال ورا ما تجيب الماء انت
صالح : اقول اسكتي لا يسمعتس ابوي والله ان يذبحتس
الترف : وشوله يذبحني اقول تعبت
صالح : افااا اجل اخت صالح تتعب
ضحكت الترف بتسليك : ايه اخت صالح ما تتعب وصالح مستريح
صالح: من قالتس اني مستريح بالعكس هذاني من الفجر وانا اكرف وعلى الطاري جهزي قهوه وشاهي بيجون رجال لابوي وييقول قل لترف تعجل
الترف: منهم اللي بيجون
صالح: ضيوف جارنا ظاهر عزمهم ابوي وبيجلسون عندنا لين يجي يعرس ولدهم
الترف : وليه ظافر ما يضيفهم
صالح: ابك اسكتي ابوي لا يسمعتس تردين الضيوف وبعدين هم ماخذين بنت ظافر ولا يبون يكلفون عليه
الترف : اخسسس دويده اعرست
صالح: اييه اعرست وانتي باقي موتي يلا
الترف : انقلع بس
ورااحت وهي تجهز لضيوف ابوها وتسمع اصوات الزغاريط في بيت ظافر وحريم الجماعه عندهم
................••............
وفي بيت ابو ثنيان كان ابو ثنيان وام ثنيان ودلال جالسين يتقهون في المشب
دخل سيف : سلام عليكم
الكل : وعليكم السلام
ودخل بعده بندر ونواف وقال نواف وهو عافس وجهه : يبه عطني مفتاح سيارتك بروح الكليه
سيف : سيارتك وين !؟
نواف: سيارتي خرده معاد ابيها ابي غيرها توقف علي فالطريق تسعين مررره
ابو ثنيان: اقصر صوتك وانت تكلم ابوك وجع
نواف اسرع وهو يجلس جنب ابوه ويبوس كتفه : خلك منه هو وابوه واسمع ولدك
ابو ثنيان بحده : وش عندك انت بعد
نواف : يبه ذا الايام ماعندي دوام فا اتفقت انا والعيال نطلع نتمشى
ابو ثنيان: وين بتروح
نواف : ضواحي المملكه والله ما اروح بعيد يبه
دخل ثنيان وهو يقول : صبحهم بالخيير
الكل : صبحه بالرضا
تقدم ثنيان وهو يبوس راس ابوه وامه وجلس بجنب دلال
ابو ثنيان لنواف : ضواحي المملكه وين بالضبط
نواف : يعني جده الدمام ابها
ثنيان : وش ذا !؟
ابو ثنيان: اسمع وش يقول اسمع
ثنيان: وش تقول انت لايكون غاث ابوي بعد
نواف : لا والله بس استاذنه اطلع مع الشباب في تمشيه
ثنيان : منهم الشباب
نواف : تعرف ثنيان اصحابي ما غيرهم
ثنيان: كم يوم !؟
نواف : اسبوع
سكت ثنيان وهو يراقب ابوه وامه بهدوء
وقال ابو ثنيان: وش قولك يا ثنيان
ثنيان : خله يروح نرتاح من حنته شوي
ابتسم نواف وهو يبوس كتف ثنيان: مع انك سبيتني بس تمون
ابو ثنيان: تروح لكن جوالك اول ما ادق ترد عليه تسمع
نواف: اسمع
ام ثنيان: انتبه من عيال الحرام
نواف : منتبهه ماعليك
بندر : يبه يلاااا مالي خلق من الصباح
ثنيان لف وهو رافع حواجبه: انت من تكلم انت؟!
بندر: ابوي
ثنيان: تكلم ابوك كذا !!؟
ابو ثنيان: لا ما شفت شي بعد
بندر : انا قاعد اكلم ابوي
سيف : وللللد احترم جدك
بندر: طيب عطني المفتاح وبروح خلاص
ثنيان وقف بغضب من طريقة كلام بندر معهم ومع ابوه : وجععع ان شاء الله مفتاح ما رح تاخذه وانقلع من هنا قبل اوريك شغلك
بندر : يبه ابي المفتاح
سيف : سمعت عمك وش قال توكل يلا
بندر: اوووه كل سالفه لازم يدخل بها عمي
ثنيان اللي فار دمه وسحب عقال سيف وهو متجهه لبندر بس وقفت دلال :لا دخيلك ما تطقه باقي صغير وطايش لا تنكد علينا من الصبح
ثنيان : دلاااااال ابعدي خليني اربي عديم التربيه هذا
سيف وقف : اتركه يروح بس مفتاح ما بياخذه وخله يروح
بندر طلع وهو يتحلطم وثنيان اللي غمض بغضب : اسمعني زين يا سيف يا تربي ولدك زين ولا تركني اربيه
سيف : وش اسوي فيه ما بقى شي ما سويته
دلال : يا ناس هذا مراهق خلوه بيصحى على نفسه ويعقل
ثنيان: ترا محد مودينا في ستين داهيه الا مراهق ومراهقه نتركهم ينفلتون بعذر المراهقه لكن اقولها اخر مره وصلوله لو ما تعدل بيشوف مني شي يموت ومانساه
رمى العقال وطلع وهو يمسح جبينه بغضب وقف لما حس انه اصتدم بشي رفع راسه وهو يمسك رهام بسرعه قبل تطيح: انتي وين عيونك بعد
رهام : بسم لله ثنيان فجعتني ما حسيت فيك
ثنيان: حسي بعدين حسيييي
طلع وتركها وهي تناظره باستغراب شافت نواف طالع ومسكته: وش فيه
نواف : كالعاده عصبية ثنيان ولسان بندر
رهام: اوف ياربي زهقنا والله
نواف : اتركيهم وروحي جهزي لي شنطتي يلا
رهام: وافق ابوي ؟
نواف : وافق ثنيان
رهام: ههههههههههههههه كان من البدايه كلمت ثنيان
نواف : اكلم ابوي اهون علي ستين مره من اني اكلم ثنيان
راح وهو يجهز بحماس لطلعته
................••............
الظهر في بيت ابو محمد وقف محمد على دق الباب فتح الباب وابتسم : حي الله ثنيانوه
قرب له ثنيان وهو يسلم عليه بقوه : الله يحيك يا محمدوه
محمد غمض من قوة سلام ثنيان : كسرتني وجع
ثنيان هبده للمره الثانيه وتركه ودخل وهو متجهه لعمه اللي كان منسدح وهو يسلم على راسه : مساك الله بالخير يالشايب
رفع راسه بمحمود : هااااه
ثنيان بصوت اعلى : مساااك الله بالخيييير
ابو محمد : مساك الله بالنور ثنيان!
ثنيان: افااا ناسيني
ابو محمد : نساك موتك مانسيتك
منيره اللي قربت وهي تنزل تسلم عليه: سلام عليكم يبه
ابو محمد : هلا يا بنتي
سلم محمد عليه وقال : من انت !
ثنيان : محمد ياعمي
جلس ابو محمد وهو يناظر بشويش في محمد : محمد ولدي ! وجع انت تلعب علي
محمد نزل وهو يقول : لا يببببه هذا محمد ولد ثنيان ومنيره انا هنا هنا
ابو محمد : ماشاء الله جاهم ولد متى
ابتسم ثنيان وهو يناظر محمد اللي قال: جاهم من 10 سنين يا يبه وش بلاك نسيت سميي
ابو محمد : هو سميك
محمد :اييييه سميي
ابو محمد وهو يرجع ينسدح : اجل والتبن انقلع انت وياه
ضحك ثنيان يرفع صوته: لا يخسي مب سميه سميي ابوي
ابو محمد : ان كان سمي ابوك ياحليله وان كان سمي هالخبل يعقب
ثنيان:هههههههههههههههههه محمد وش مسوي
محمد ضحك ويصب القهوه : عطيته الابره غصب وعصب علي
منيره: الله يهديك كان سايرته
محمد : وين اسايره لو بسايره ماخذاها وهو ماينفع يتاخر
ثنيان: مالك الا اجر ، محمد قم خذ القهوه من خالك
محمد وقف وهو ياخذ القهوه ومنيره تنزل السفره
................••............
عند الترف جلست وهي تنزل صحنها بتعب بعد ما نزلت الاكل لرجال وجهزت كل شي يحتاجونه
سمعت احد ينادينها بهمس وقفت بضحك : نوره تعالي تعالي جيتي بوقتس توني منزله الغذاء
نوره ( صديقة الترف ) : قولي والله اشوا لحقتس
جلست الترف : وينتس من صبح ربي انتظرتس ماجيتي
نوره: اسكتي جيت بقولتس وش صار عند دويده (عياره لوحده مايحبونهاا)
الترف : ايه ايه بسرعه قولي وش صار
نوره : لو تشوفين وش جايبين لها حمولتها الذهب السلسال الواحد لو اضربتس به تنصرعين والهدايا اللي تشق القلب
الترف بشمئزاز : اخسس يا وجهها
نوره: لا اسكتي ما حكيت باقي
الترف : وشو بعد
نوره : انتي ما شفتي سيارة المعرس تلق لق لكنه هو خايس وجايب بعد لها جوال
الترف : في ذمتس جواااال وش قال ظافر
نوره وهي تشرب : بالله اسكتي ظاهر لو تشوفين مايقص راسه مية سيييف
الترف : اييه ياحبيبتي حظ القبايح فالسماء لايح
نوره : ان شاء الله يالترف تعرسين بواحد احسن منها مليون مره ونفرح فيتس