رحلتي مع الطرحة _ ابتدت

[عسووولة]

السلام عليكم ورحمة الله وبركاته

آكثر شي يقهرني بموضوعٍ مــآ .. انه يكون العنوان .. غامض
والمقدمه .. غامضه ..
ولآزم الواحد يقرى عشر طعش سطر عشان يعرف زبدة الموضوع
عشان كذآ بقولكم من البدايه ..
موضوعي بيتكلم عن ( الفتاة حديثة الزواج ) <<< امــش
عن ( هموم هالحياة الجديدة .. من مسؤليات & زوج & بيت & تنظيف & طبخ ونفخ )
كل شي بتكلم عنه من واقع تجربه عشتهآ
وهالكلام يمكن ناس تأيده وناس ماتأيده .. انا اتكلم من وجهة نظري .. واللي اشوفك صح وكلامي يحتمل الخطأ والصواب
حبيت بهالموضوع اكتب اشياء جديده على البنات .. يعني مثلا .. البسي .. تدلعي .. تكشخي ... هذي ملينا منهااا

مثل كل بنوته زواجها قريب كنت مبسوطه
وبراسي الف شغله بسويها عشان تكون ليلتي احلى ليله
فساتين .. اكسسوار .. مكياج .. الخ الخ وهالاشياء اكيد الكل يعرف وش كثر هي صعبه وممتعه بنفس الوقت
ودآيمآآآ تلقوني بموضوع العرايس


بنآآآآآآت الحقوووني وش احسن تسريحه
بنآآآآآت وش آحسن فستان
بنآآآآآآآت اخلي فستاني ابيض والا احمر .... الخ

طبعآ ماكنت مسجله كنت اتابعكم من خلف الكواليس .. لان اصلا اي سؤال يطري على بالي يسألونه البنات فماله داعي اتعب نفسي واسجل << اخلصي
كنت دايماا اقول للي حولي ( يااربي والله اني خايفه من مسؤلية الزواج )
كنت فعلا خايفه ... بس بصراحه احس بمتعه من هالخوف ومن هالتغير بحياتي
يعني .. كنت اتدلع بالتشكي .. بنسبة 70%
ماكنت عارفه وش مستخبي لي



**

ووووووووووووتزوجنآآآآآآ
فرحنآآآآآآ رقصنآآآآ .. عشنآآآآ احلى وقت
وعسلنآآ ( يعني رحنا شهر عسل )
المهم :
بعد ماخلص هالشهر .. بدى الزواج يكشر لي عن انيابه
بدى الجد
زوجي يبي غدآ .. يبي عشى .. يبي ملابس نظيفه .. يبي ويبي ويبي

لاحد يردولا بالماوس

[عسووولة]

.. جايتكم بالحكي لاتستعجلون








بعد زواجي كنت اسعى اني اكون ( طباخه 100% بمرتبة شيف مبدع اتقن كل الطبخات وبطريقه ممتازه ولو فشلت بطبخه تسود الدنيا بوجهي واتعب نفسيآآ
ولازم يكون لبسي عند زوجي من ارقى واحلى لبس وادقق على التفاصيل الصغيره جدآ وكأني بطلع على خشبة عرض ازياء
كنت ارتب شعري بطريقه لازم تكون فيها التسريحه مضبوطه 100% والا إكتئبت
كنت ابي تكون عطوراتي احلى روائح بالعالم
كنت إذا قلت كلمه زعلت زوجي واحس اني غلطت فيها اتعب نفسيآ
كنت ابي اكون اجمل نساء الارض بعيون زوجي
كنت ابي يكون بيتي احلى واجمل بيت بالعالم
كنت ابي اصير اتقن كل شي بطريقه دقيقه .. كنت ابي اكون ملآك
ابي اكون ربة بيت وزوجه ناجحه 100%

صح الحرص على الحياة الزوجيه ونجاحها .. شي حلو
بس مو بطريقة مبالغه كذأ
كذأ راح تتعبين نفسيآآ
لان مستحيل تكونين ناجحه بكل شي بالحياة وبدرجه الاتقان
وراح توصلين لمرحله تتعبين فيها وتحسين ان الزواج شي مو حلو وانه مسؤليه عظيمه
تسوين طبخه وتنجح بنسبة 70% هذا شي حلو
يكون لبسك حلو بدرجه معقوله ..
تتكلمين مع زوجك بطريقه عاديه ولآتتصنعين المثاليه
تنجحين بزواجك وبحياتك الجديده لكن بطريقه ممتعه
وطبعا كل وحده لها ميزتها الخاصه .. مثلا : وحده تقدر تكون طباخه بمرتية شيف مبدع .. لكن عاديه بالجوانب الثانيه .. فـ تستغل هالموهبه بطريقه حلوه
مثلا غيرها تكون بنوته لهلوبه وذربه بالكلام
غيرها تكون حنونه ورومنسيه .... وكذآ
يعني كل وحده تشوف الميزه اللي عندها وتعززها .. وتهتم بالجوانب الثانيه بطريقه حلوه
وبنفس الوقت تحاولين تتركين صفات فيك ماتحبينها .. مثلا : العصبيه
اذا انتي عصبيه حاولي تمسكين اعصابك وتكونين هاديه شوي .. لان هذا زوجك ماهو ولدك عشان تعصبين عليه
اذا انتي تحبين تطلعين كثير ومشواريك ماتخلص .. حاولي تقللين مشواريك شوي لان عندك بيت وزوج مسؤله عنهم

وكذآ

تحاولين تبدين حياتك الجديده بطريقه عقلانيه وواقعيه .. عشان ماينصدم زوجك بعدين ولآ انتي تكرهين حياتك الجديده
انا مااقول اهملي زوجك وبيتك .. لآ
انا قصدي حاولي تكونين واقعيه وتفكرين بالمور بطريقة صحيحه وتوزنينهآ .. لآنك مانتي ملآك ..

**

اول شي فقدته بعد زواجي ( النوم)
قبل زواجي كنت دااايمااا .. اسهر خصوصاا بعد تخرجي .. مرات كنت اواصل يومين
مرات انام 12 ساعه متواصله من الفراغ والسهرر
لكن الحين ... لا والف لا .. دآآ بعدي
لازم لازم تصحين قبل زوجك ..
يعني تخيلي زوجك صاحي وجالس وانتي بسابع نومه احس المسكين بيحس بإحبااط
تخيلي يرجع زوجك من الدوام وانتي نايمه تو بآآآد
لازم يكون فيه تنظيم شوي لنومك ..
ولازم لازم تعرفين إنه فيه واحد مسؤله عنه انتي الحين << صار ولدي مو زوجي

**

[عسووولة]

الاهتمام

بإختصار .. عاملي زوجك كأنه ولدك
شفتي الام شلون تخاف على ولدها وتداريه !!
بصراحه انا من هالناحيه احس اني مقصره مع زوجي ( ببداية زواجي) مع اني كنت واعيه كثير وفاهمه امو الزواج كثييييررر ... بس الواقع غير
بقولكم موقف مريت فيه :
طبيعت عمل زوجي .. انه يجي العصر ... اوكي
فكنت اسوي الغدى الساعه 3 .. طوول ايام الاسبوع ... والخميس والجمعه مااسوي شي
لانه يتغدى مع اهله تحت .. لانه وقت الغدا يكون موجود ومو لازم اسوي شي ... اووكي
كان يوم خميس .. وزوجي نايم ... لانه كان سهران ماصحى الا الساعه 3 تقريباا
وطبعاا انا ماسويت لاغدا ولا شي لان اليوم خميس ( مثل ماتعودت)
لكن غاب عن بالي ان الساعه 3 .. واهله تغدوا وخلصوا
والاخت فالله كانت تقلب بقنوات التلفزيون وتتفرج
اول ماقام من نومه ماقال لي شي ... بس كان موده زيرو
بس باليل ... انفجرت القنبله
انتي ماتهتمين فيني
انتي ماتفكرين فيني
الخ الخ الخ

كان المفروض اني افكر بزوجي ... اذا قام وش بياكل ؟!
مااكون زي الآله اسوي واجباتي بالحرف .. من غير تفكير
يمكن تكون غلطتي بسيطه .. بس خربت علي يوم كامل
للمعلوميه يابنات .. ترا نقد الزوج مثل الطعنه بقلب زوجته
احساس غبي .. وان شاء الله ماتمرون فيه مثلي

**


النصايح وماادراك مالنصائح

قبل زواج البنت تلقين النصايح بالهبل من كل جهه
لاتعطينه وجه
لايمشي رايه عليك
عوديه من البدايه
الخ الخ
اغلب خراب هالبيوت من هالنصايح الغبيه
قبل كل شي شوفي حيات اللي نصحتك ؟ هل هي ناجحه مع زوجها ؟؟؟
وبعدين الحياة على ارض الواقع غير غير غير واكبر بكثير من كلام ونصايح
هذآ انسان ارتبطتي فيه .. له طبعه وشخصيته وحياته الخاصه
يعني معقوله تبي تمشينه وتعودينه على اللي تحبين ؟؟
وهو .. وين رغباته ؟ وين رايه ؟
تعاملي مع زوجك بعفويه .. حبيه .. احتويه .. طيعيه
انا مااقولك لاتقولين له لا ابد ولو على حساب نفسك ..
قوليله لا (بأدب) يعني ناقشيه .. فهميه وجهة نظرك ..
واذا مااقتنع .. تنازلي .. وخليه يمشي رايه
لانه لو عندتي بيمشي رايه غصبن عنك
فاحسن انه ينفذ اللي يبيه وانتي راضيه والا غصبن عنك
هو المره الجايه بيحس على دمه وبيجي اليوم اللي هو يتنازل عشان عيونك
بس انتي ابدي اول ولا تعندين

إنتظروني .. واللي بترد بالماوس على خشتهآ

[عسووولة]

اهل زوجك
ماراح اتكلم كثير بهالموضوع
بإختصار :
اذا اهل زوجك طيبين وحبيتيهم وحسيتيهم مثل اهلك
صيري لهم بنت .. حطيهم بعيونك ..
اما اذا مشاكلهم كثيره وتصرفاتهم غبيه
فنصيحه .. خلي علاقتك معهم سطحيه وبس
اهم شي الاحترام

**
الحساسيه
ببداية زواجي كنت بس آبكـ ــي

اي شي يسويه زوجي افكر مية مرره ليش قال كذا .. ليش سوا كذآ
وافسر تصرفه بشكل غبي وسلبي
مره من المرات كانت امي تعبانه .. الله يخليها لي ويطول بعمرها ياارب بصحه وعافيه وتشوف عيال عيالي (قولوا آمين )
كانت امي تعبانه .. وانا عندها .. كلمني
قلت له .. امي تعبانه وودي انام عندها اليله
فقالي : نامي عندها
انا هنا انصدمت
سكرت السماعه وبكيت
جاني الشيطان يوسوس :


هذا مايبيني
هذا ماصدق على الله
هذا يكرهني
مايشتاق لي

وزوجي المسكين كان قصده عشاني وعشان امي

اكتشفت بالاخير ان زوجي مايقول كلام ويقصد غيره ... وانه عفوي وواضح جدا وماعنده لف ودوران وتلميح( وهالشي باغلب الرجال اذا ماكان كلهم)
وحتى لو يكرهني قالي اكرهك بوجهي
يعني احس انه التلميح والكلام من تحت لتحت يخص معشر النساء فقط
والرجال برئ منها
فـ عشان كذا لا يلعب عليك الشيطان ويقولك ترا قصده كذا ترا يبي كذا ... الخ
اللي يبيه منك زوجك بيقوله بوجهك .. ماراح يلمح لك وماهو مجبور
فـ خلي نيتك صافيه
قبل مايكون عشان زوجك .. فهو عشانك عشان سعادتك



**

الرجل : كآئن حي (مفهي) جدآ

كثير من صديقاتي يشتكوون
زوجي مو رومنسي
زوجي تقل شايب
زوجي ماعنده احساس
زوجي مايقولي احبك ... الخ

اغلب الرجال كذآ صح ؟
للاسف اكتشفت ان الرجل : كآئن حي (مفهي) جدآ
وهذا شي عادي وطبيعي جدآ ..
وياما وياما توقعت من زوجي حاجات وانصدمت
مرره كنت مسافره مع اهلي من دون زوجي
وكان هو بالبيت لحاله
غبت يومين .. وكانت بيننآ اتصالات رومنسيه وحلوه
فقلت بس ياابنت
اكيد مسوي لي بارتي
اكيد مطفي انوار البيت وماليه شموع عشان يستقبلني
وانا بالطريق افكر .. ومتحمسه
وباصمه بالعشر ان اليله غييييرر
بس
يوم دخلت البيت
مغبر وحالته حاله وفاتح النجفات ويفصفص
سلم علي ونزل عند اهله
هو ماسوى هالتصرف عشانه مايحبني لآ
انا متأكده انه يحبني .. وانه فرح برجعتي
اشوف الفرحه بعيونه
لكن : يعبر عن حبه بطريقه غير
عشان كذآ .. لاتكبرين الموضوع وتأزمين الوضع وهو مايستاهل
مع الوقت بيفهمك

لا تردو

[عسووولة]

البيت هو مملكتك الخاصه
يعني لك وبس .. انتي اللي تتصرفين فيه على كيفك .. لو تبي تحرقينه
ماحد بيكون مسؤل عنه غيرك انتي وبس
ولا احد راح يساعدك
عشان كذآ لآزم يكون نظيف ويفتح النففففس
بالنسبه لي احلى وقت للتنظيف ( الصبح) احس بنشاط مو طبيعي
بالبدايه حسيت انه متعب شوي .. خاصة الغبااار اللي مدري وش يبي !!
بس مع التنظيم كل شي يصير سهل
سويت لي خطه بسيطه اكررها بشكل شبه يومي ..
وراح اعرضها هنآآآ ..

اول ماتقومين .. وتفطرين .. تبدين بغرفة النوم ..
رتبي السرير
التسريحه
مسحي اثاث الغرفه عن الغبار ولمعي المرايا
افتحي الشباك للتهويه
دايم افتح شبابيك البيت بالصبح .. احس ان بيتي يتنفس
واطلعي ..
شوفي باقي الغرف والصاله ..
مسحي الاثاث من الغبار .. رتبي البيت
واذا عاد خلصتي .. جيبي المكنسه الكهربائيه .. وكنسي عاد البيت كله مره وحده
ابدي بغرفة النوم .. وبعدين باقي البيت
حتى السراميك كنسيه بالكهربائيه وحتى الموكيت ..
( فيه طريقه انا اسويها بالمكنسه .. مرره حلووه .. بقولها للفائده :
تفرغين كيس المكنسه وتغسلينه وتنشفيه .. بعد مايجف دهنيه بدهن عود حلوو .. او اي ريحه ثابته وحلوه
وركبي المكنسه ... شوفي عاد اذا كنستي وش الروائح اللي تطلع من المكنسه ... شي خياال بس ودك تكنسين )
نرجع لموضوعنا :بعد ماتكنسين ... جيبي عاد مكنسة السيراميك آو فوطه وحطيها على شطافة الارض
عبي سطل بـ ( داك بريحة العود + شوي ديتول + شوي فيري) انا احب هالخلطه مرره
بعدين مسحي الارضيه بداية من غرفة النوم الى الصاله وباقي الغرف ...
وبكذآ نكون خلصنا من البيت
ياخذ مني تقريبااا ساعه لان بيتي صغنون


**
نروح عاد للحمام (الله يكرمكم)
اغسله عاد فرك بذمه ( تايد + كرولوكس+ديتول)
مرات اغسله بـ (هاربيك)
( قال خلطات قال )
اول مااصحى من النوم اصب على المرحاض وارضيه الحمام منه
واطلع اسوي شغلي ... اخليه تقريباا نص ساعه او اقل او اكثر على حسب وقتي..
وارجع اشطفه واغسله عاد بالتايد والكلوركس والديتول
بس الهاربيك مااستخدمه بشكل يومي ... يعني بالاسبوعين مره
او متى ماحسيت انه الحمام يحتاج تنظيف ..
عاد يصير يلق لق .. ويفتح النفس ..

بعد مااخلص من الحمام اغسل (المغسله) .. ماعندي الا وحده ببيتي
واغير بشكلها مرات

خلصنا عاد من البيت


وش بقى ؟!

بقى المصيبة العظمى (المطبخ )

عاد المطبخ حدث ولاحرج
يبي ينحاس بشكل يومي غصبن عنك
ولو اتكلم من هنا لبعد بكرآ .. ماراح تكفي
* راح اختصر تنظيف المطبخ بنقاط تسهل لك المهمه :

1 لاتنامين ابد الا والمطبخ نظيف .. انا ببداية زواجي انام والمطبخ حوسه مرات واقوم عاد ونفسيتي آآععـ من سبة هالمطبخ
يعني انا انظفه والا انظف البيت والا اسوي الغدآ ؟!
2 الزباله تطلع بشكل يومي
3 كل صحن تستعملينه غسليه اول ماتخلصين عشان ماتتكدس عليك بعدين ماتطيح الا براسك
4 الفرن .. آول مايتوسخ غسليه لاتقولين بعدين .. لو حتى حبة رز طاحت عليه امسحي مكانها
5 الثلاجه نظفيها من وقت لوقت وشوفي اللي منتهي صلاحيته او الخضار الخربانه وارميهم اول بأول .
6 لاتنسين تلبسين قفازات ليدك عشان ماتصير جافه وتحافضين على نعومتها
هذآ بإختصار



رآجعه لآحد يرد

[عسووولة]

الوقت

كل مانضمنا وقتنا صار عندنا وقت اكثر
خصصي وقت لبيتك وقت لطبخك وقت لزوجك وقت لنفسك .. وهيك
اذا نظمتي وقتك واستغليتيه بتحسين براحه ورضى عن النفس عجييب
راح اضرب لكم مثال :قمت الصبح .. مالي خلق انظف البيت ولا اسوي شي ابد
ضيعت وقتي ع tv او النت
وتروح ساعه ورى ساعه .. ضاع الوقت .. ماسويت غدا
وطيراان اسوي الغداء
طبعا مانضفت شي .. والبس ع السريع وانضف على خفيف
يجي زوجي يتغدى ويسولف معي وانا طفشانه
ليش ؟؟ عشان ادري وراي شغل بالمطبخ والبيت والغسيل و .. و..و..
اتذكر اني اليوم المفروض ازور اهلي
طيراان اجهز نفسي لان زوجي وراه مشوار ولازم مايتأخر
كنت ناويه اسوي حلى وآخذه معي
بس ماعندي وقت
اروح لاهلي وانا فيني تكه
لييييييييييش ؟ّ!
عشان بيت هالعزابيه اللي خليته يبي له عمال من كثر الاشغال اللي كدستها
ارجع للبيت
اجلس مع زوجي شوي
ونسهر مع بعض ... ومازالت كل حوستي مكدسه
تتوقعون بسهر وانا رايقه ؟

عاد لاجيت انام .. اقول خليه بكرى الصبح
ويتكدس شغل اليوم وبكرى

**

طيب مثلا لو ..
قمت الصبح خلصت شغلي ونضفت كل شي
سويت الغداء برواق ونضفت بذمه
جاء زوجي وروقت معه 100%
سوالف وفله
ليش ماافلها
وانا انجزت .. وخلصت كل واجباتي
راح اصير كل اليوم رايقه ومودي تمام
هو الشغل والتنظيف والتعب .. فيك فيك
فـ ليش التأجيل ؟
**

حاولي تدونين الاشياء الضروريه بدفتر عندك بالمطبخ
وعلى فكره مستحيل الوحده تكون منظمه وقتها زي الساعه .. لابد يكون فيه خربطه شوي
عشان كذا اذا خربطتي شوي لاتقولين انا مااقدر انظم وقتي وانا ماتعودت وانا وانا وانا .. لآ
الوحده المفروض تحاول عشان ترتب يومها واشغالها ..
ماراح اكثر كلام .. اللي حابه اقوله ان تنظيم الوقت له متعه كبيييررره وراحه نفسيه لاتوصف
جربوا تكتبون اشياء لازم تنجزونها بكرى واكتبوها اليوم .. وسوو كل شي كتبتوه شوفي كيف الراحه النفسيه




محدش يرد ... باقي شوي

[عسووولة]

سعادتي
هذي هي اهم نقطه عندي ّ << اووم الانانيه
بالبدايه قلت لازم الوحده تهتم بنفسها وزوجها وعيالها وبيتها ... الخ الخ
بــــــــــ ــــــــــس ..
هذا كله مو معناته تهمل نفسها وسعادتها لآ
ولا تكونين ( زي الشمعه تحرقين نفسك عشان غيرك) لآ والف لا << اكره هالمثل مدري الحكمه
وش اللي زي الشمعه ؟؟ واحرق نفسي !! معصي
مافيه شي زي يستاهل احرق نفسي عشانه << برآ
صيري .. زي ( اللمبه تدفي نفسها وتفيد غيرهآ ) << برآ من جد
اللي اقصده لآ تسوين شي على حساب نفسك حتى لو كان يفيد غيرك
هذآ مو معناته انك ماتتنازلين شوي عن حاجات .. عشان زوجك .. لآ
الوحده لازم تتنازل شوي عشان زوجها وسعادته وسعادتها هي بعد
بس انك تنسين نفسك وتحرقين نفسك وتتبهذلين وتقطعين نفسك عشان زوجك .. هذا اللي لآ ..
اضرب لكم مثال عشان تفهموني اكثر :

مثلا زوجي شغله متعب شوي ونادرآ مايفضى لك واذا رجع للبيت يبي يرتاح .. وانتي تبين تطلعين تبين تتمشين تبين تنبسطين ..
بهالحاله تتنازلين وتصبرين عشان زوجك ؟
والا تقولين لآ .. انا مالي شغل ولآزم انبسط ..؟! انا ماني زي الشمعه !!

لآ طبعآ

بهالحاله لازم تتنازلين وتصبرين وتريحين زوجك لانه المسكين ماقصر بشي .. ولآتحملينه فوق طاقته

..

مثال ثاني :

مثلا انتي تدرسين بالجامعه .. وتحبين دراستك كثير
وزوجك قالك اتركي الدراسه عشان تهتمين فيني .. الدراسه اخذتك مني !!
بهالحاله تتنازلين ؟؟ والا لآ .. !!

لآطبعاا

لاتتنازلين ابدآ .. هذي دراستك وحياتك
وكلامه يدل على انانيته .. فـ مايستاهل اسوي شي عشانه ابد

يارب تكونوا فهمتوني
اللي ابي اوصله ان الزوج له حقوقه واحترامه وتقديره .. لكن ماهو كل شي بحياتي
سوي لك كيان بعيد عنه شوي
ادرسي .. توضفي .. ادخلي دورات ..
دلعي نفسك
اسهري لحالك ( كتغيير ) واختاري الفلم اللي تحبينه انتي
اطلعي .. لاتقاطعين صديقاتك لمجرد انك تزوجتي << اكره البنت اللي كذآ
العبي مع البزران شبره امره << تقل زودتها شوي
اللي ابي اوصله .. ان اللي تتزوج لازم ماتحرم نفسها من اشياء تحبها عشان انا تزوجت انا صرت كبيره وعيب لآ
سوي اللي تحبين .. ابسطي نفسك قد ماتقدرين ..
انا للحين اتفرج على افلام كرتون ..
ودايم يعلقون علي .. انتي تزوجتي ويبي يصير لك عيال (إن شاء الله)
طيب
واذا تزوجت ؟!
يعني اثقل واصير رزينه واتحجب والبس نظاره طبيه
انا كذآ .. سوآ تزوجت والا لآ ..
انا استغرب من اللي تتغير لمجرد زواجها
وودي افهم سر هالتغير ؟!
يعني معقوله الوحده اذا تزوجت تتغير شخصيتهآ !!
والا تتصنع ؟!

[عسووولة]

آخيرآ ..
الساعه 8 وانا مواصله عشان الموضوع
ولا من اليوم انصح بعد
كان ودي الموضوع يكون احسن من كذآ
بس ماقدرت اتعمق اكثر وحبيت اذكر اشياء مرت علي شخصيآ
مابي الا .. دعوه من قلب .. وان شاء الله تستفيدون من الموضوع

خلاص تعبت
الموضوع منقول