خارطة ( العمر )

[alfares]

تفطّن الفِكْر من بَعْد السنين المجدبةْ واستدار

.....واحييت ذكراي والرّوح الشِعِر والحظّ ماهو كثير

(مثل الرَّحى) وانطحن حَبّ النّدم ياصمتي المستعار

......ماشفتني يوم كنت (آشوف) كلّ اركان بيتي سرير

كنت احْسِب انّ الفضا صحن ورغيف البدْر؛قوت النهار

......والليل كومة فَحَم والشّمْس جمرةْ والسما قاع بير

يومي طِفِل طِحْتْ وآنا اركض،وصاروا يضحكون الصغار

......رميت سِنّي (لعين الشمس) واكملت اللَّعِب والمسير

ومرّ عُـــمْر الطفولة كنّه امس وكنّ ماشيّ صار

......واصبحت احثّ الخُطى للرزق واطويْ كل صعب وخطير

وامسيت حولي عيالي تحْت سَقْف عْيوني ورمش دار

......أشــوف هالكون عش/ونبضهم جنحان/ والارض طــير

اقْطِف لهم من ثَمَر عمري : عِنَب لِعْبةْ ولوز انتصار

......وفأس الايّام يضرب في عظامي والتّعَب مستطير

انفخ لهم روح من : ضِحْكَة وتدليل وأدب وافتخار

......واموت مليوووون مـــرّةْ مـــا يجيهم حـاجةْ وزمهرير

واذا اصبح الشيب يرميني بوادي الضعف والانهيار

......ذَخرْتهم : ( سيل ) ذو حدين بضْفافه نَبَتْ كل خير

اشرب فرات التعب واقتات من طيب الجنى والثمار

......وارفع كفوفي واسلّم عدّ مانامت عيون الغرير :

سلام ياعمْر وين احلاك راح وليش هذا الفرار ؟

......اهداب الاحلام شابت ياعيون الصبر وين المصير ؟

لو طااال مُرّ الزمن وتعوّدت روحي لذوق المرار

......ماصرت جاهل ولا واهن ولا واهم ولاني قصير

ولا اجهل الصخرة اللي حطّت الفتيان في سجن غار

......وياما تعلّمت من لمس الخشب والشوك : معنى الحرير

ابحرت حتى ترمّد من جمَر حظي عميق البحار

......وايقنت بان الحظوظ اقوى من ابداع السطور المثير

تفطّن الفِكْر من بَعْد السنين المجدبةْ واستدار

......واحييت ذكراي والشيب ابتدا والعمْر ماهو كثير..!