تجربتي لزيارة العلا مدائن صالح

السلام عليكم ورحمة الله
خلال اجازة الربيع قبل اسبوعين اخذت العائلة ورحت للساحل من ينبع الى املج الى الوجة
جت ببالي فكرة زيارة العلا مدائن صالح وانا بينبع اخذت العائلة وتوجهت هناك وبعد 5 ساعات بالخط وصلت للمدينة صراحة تضاريس الجبال غريبة جدا غير عن اللي تعودنا علية
وجدت اسعار السكن مبالغ فيها جدا جدا من 1000 ريال وانت طالع وشقق متهالك ما تسوا 200 ريال لو كانت بمدينة ثانية عموما اخذت ليله واحدة قلت يومين تكفي اخذ لفة بالمدينة ومعالمها
ماني حق حفلات ولا خرابيط اهم شي كان عندي زيارة مدائن صالح ويوم وصلت للبوابة كان يوم الثلاثاء جت الصدمة الاولة لقيتها مقفل قالي الحارس مقفلينها ثلوث وربوع بغيت انجلط
هي بقالة تتقفل والله ما تلقى الاهرامات بمصر ولا البتراء بلاردن مقفلة بوجة السياح ولقيت قدامي اربعه سياح من اوروباء نفس الوضع رحت لمحل التذاكر بسئلهم متى تفتح لقيتهم مقفلين نفس الوضع
بعد سوال حراس الامن عطوني رقم مسئول التذاكر قالي يومين مقفلة استحاله ندخلك قلت طيب لو جلست ليلتين وجيتكم الخميس قال ممكن
تكون فاتحة مدائن صالح وتدخل بتذاكر وهنا الصدمة الثانية سعر التذكرة 550 ريال حتى الاطفال اللي عمره يوم يندفع علية تذكرة حسبتها طلعت 4000 ريال عشان ادخل بعائلتي
والله بالسعر ذا اسافرللاردن واشوف البتراء
صراحة استغلال ومبالغة وسوء تنظيم لاهم معلم اثار بالمملكة تركتها ومشيت ونصيحة للكل المشوار للعلا ما يسوا كل هذي الخساير